അംഗീകാര വോട്ടിങ്

ജനാധിപത്യം എന്നാൽ ഭൂരിപക്ഷത്തിന്റെ ഭരണമാണെന്നാണ് നമ്മൾ പഠിച്ചിട്ടുള്ളത്. എന്നാൽ കേരളത്തിലെ തിരഞ്ഞെടുപ്പ് ഫലങ്ങൾ പരിശോധിച്ചാൽ യാഥാർത്ഥ്യം മറ്റൊന്നാണെന്ന് കാണാം. കേവലം 30% മുതൽ 40% വരെ വോട്ട് നേടിയാണ് നിലവിൽ പല സ്ഥാനാർത്ഥികളും വിജയിക്കുന്നത്. അതായത്, മണ്ഡലത്തിലെ 60% മുതൽ 70% വരെ ജനങ്ങൾക്ക് താല്പര്യമില്ലാത്ത ഒരാളാണ് “ഭൂരിപക്ഷം നേടി” വിജയിക്കുന്നത്. അതായത്, ഭൂരിപക്ഷം ജനങ്ങളുടെയും താല്പര്യം പ്രതിഫലിപ്പിക്കാത്ത ഒരു വികല തിരഞ്ഞെടുപ്പ് സംവിധാനമാണിത്. ഇതിനൊരു പരിഹാരമാണ് അംഗീകാര വോട്ടിങ് രീതി.

എന്താണ് അംഗീകാര വോട്ടിങ്

നിലവിലെ തിരഞ്ഞെടുപ്പ് ശൈലിയിൽ ബാലറ്റിലുള്ള ഒരാൾക്ക് മാത്രമേ ഒരു വോട്ടർക്ക് വോട്ട് ചെയ്യാൻ സാധിക്കുകയുള്ളു. എന്നാൽ അംഗീകാര വോട്ടിംഗിൽ ഒരു ചെറിയ ട്വിസ്റ്റ് ഉണ്ട്, ബാലറ്റിലുള്ള എത്ര സ്ഥാനാർത്ഥികളെ വേണമെങ്കിലും ഒരു വോട്ടർക്ക് പിന്തുണയ്ക്കാം. നിലവിലെ പോലെ തന്നെ വോട്ടെണ്ണി കഴിയുമ്പോൾ ഏറ്റവും കൂടുതൽ വോട്ട് ലഭിച്ചയാൾ വിജയിക്കും.

ഉദാഹരണത്തിന്, മത്സരരംഗത്തുള്ള അഞ്ച് സ്ഥാനാർത്ഥികളിൽ മൂന്ന് പേർ യോഗ്യരാണെന്ന് തോന്നിയാൽ, ആ മൂന്ന് പേർക്കും ഒരേസമയം വോട്ട് ചെയ്യാം ഒരാൾക്ക്. വോട്ടെണ്ണി കഴിയുമ്പോൾ നിലവിലെ പോലെ തന്നെ ഏറ്റവും കൂടുതൽ വോട്ട് ലഭിക്കുന്നയാൾ വിജയിക്കും.

അങ്ങനെ വരുമ്പോൾ മണ്ഡലത്തിലെ കൂടുതൽ ജനങ്ങളുടെ പിന്തുണ ഉള്ള ഒരാൾ ആയിരിക്കും വിജയിക്കുന്നത് — ഒരു പൊതു സമ്മതൻ

അംഗീകാര വോട്ടിങ് പരിഹരിക്കുന്ന പ്രശ്നങ്ങൾ

• വോട്ട് പാഴാകുമെന്ന ചിന്ത: “ഇഷ്ടപ്പെട്ട സ്ഥാനാർഥിക്ക് വോട്ട് ചെയ്തിട്ട് കാര്യമില്ല; അവൻ ജയിക്കില്ല” എന്ന ചിന്ത പലരെയും മനസ്സില്ലാതെ ‘ജയിക്കാൻ സാധ്യതയുള്ള’ മറ്റൊരാൾക്ക് വോട്ട് ചെയ്യാൻ പ്രേരിപ്പിക്കുന്നു. ജയസാധ്യത നോക്കി വോട്ട് പാഴാക്കുമെന്ന ഭയമില്ലാതെ, തനിക്ക് ബോധ്യമുള്ള എല്ലാവർക്കും ഒരേസമയം വോട്ട് നൽകി, യഥാർത്ഥ ജനവിധി രേഖപ്പെടുത്താൻ വോട്ടർക്ക് സാധിക്കുന്നു.

• വോട്ട് ഭിന്നിപ്പിക്കൽ ഒഴിവാകും: സമാന ആശയങ്ങളുള്ള രണ്ട് സ്ഥാനാർഥികൾ മത്സരിക്കുമ്പോൾ നിലവിൽ അവരുടെ വോട്ടുകൾ വിഭജിക്കപ്പെടാം(vote splitting). ചിലപ്പോൾ അതിന്റെ ഗുണം മൂന്നാമൻ കൊയ്യും. അംഗീകാര വോട്ടിങ്ങിൽ ഇത് വലിയ പ്രശ്നമല്ല. കാരണം വോട്ടർക്ക് രണ്ടുപേർക്കും പിന്തുണ നൽകാം.

രാഷ്ട്രീയത്തിൽ എന്ത് മാറ്റം വരും?

ഇന്ന് പല രാഷ്ട്രീയക്കാരും സ്വന്തം കോർ വോട്ടർമാരെ മാത്രം സന്തോഷിപ്പിച്ചാൽ മതി എന്ന് കരുതുന്നു. ചിലപ്പോൾ ധ്രുവീകരണവും വെറുപ്പും പോലും തെരഞ്ഞെടുപ്പ് തന്ത്രമാകുന്നു. പക്ഷേ Approval Voting-ൽ അതുകൊണ്ട് മാത്രം രക്ഷയില്ല.

വിജയിക്കണമെങ്കിൽ സ്വന്തം പാർട്ടിക്കാരുടെ വോട്ട് മാത്രം പോരാ; മറ്റു പാർട്ടിക്കാരുടെയും നിഷ്പക്ഷരുടെയും സാധാരണക്കാരുടേയുമെല്ലാം അംഗീകാരം വേണം എന്ന നിലയിൽ എത്തും. അതുകൊണ്ട് രാഷ്ട്രീയക്കാർക്ക് വെറുപ്പ് പരത്തുന്നതിനെക്കാൾ കൂടുതൽ ആളുകൾക്ക് സ്വീകാര്യനാകുക എന്നതാണ് ലാഭകരം. ചുരുക്കത്തിൽ, Approval Voting ഒരു വോട്ടിംഗ് മാറ്റം മാത്രം അല്ല. അത് രാഷ്ട്രീയത്തിന്റെ incentive structure തന്നെ മാറ്റും.

“ഭിന്നിപ്പിച്ച് ഭരിക്കുക” എന്ന രാഷ്ട്രീയത്തിൽ നിന്ന് “കൂടുതൽ ആളുകളെ ഒപ്പം നിർത്തുക” എന്ന രാഷ്ട്രീയത്തിലേക്കുള്ള ഒരു ചുവടുവെപ്പ് ആയിരിക്കും ഈ പരിഷ്‌കാരം.